الابوذيات
انا العايش بأمل روحي وأملكم
وأبد مـا يـوم اعـوفنكـم واملكـم
الكلب لولحضة ينساكم ويملكـم
اكص كلبيي واشمرة بهاي ادية
************************************************************
أشد حيلـي ويبيد ابسـاع وانحــل
تعب جسمي وهلك بالظيم وانحل
يسادس درس يمته اتروح وانحل
أخاف اتأخر ويزعل عليه
************************************************************
چنت ظهره بوكت عوزه وسده
وعليــه اليــوم صك بابه وسده
شجــاه الچنت الـه مخــده وسده
عله بايه وبده ايشمرعليه
************************************************************
ابلهيب الشوگ كل اعظاي وجن
وتيهت السنيـــن المضــن والجن
مثــلك مــاشفت بالإنس والجـــن
جلت قدرته السواك الية
************************************************************
أحلفنك تگلي الصدگ بالله
منو مثلي بچه والثوب بالله
فــراگك زيدالي الطين بلـه
وفوگ اهموم حط اهموم بية
************************************************************
بغيابك تيهت صومي والامساك
وصباحـك مايكفينــي ولا مساك
ألف هنيالــي اذا شمـك ولمساك
واطفي بشمتك نار اللي بية
************************************************************
إلك بس انتـه هل دمعـي والك صاب
والك ساس بوسط روحي والك صب
سهـم هجـرك دخـل گلبي ولك صاب
دليلي وصار طشاره بدية
************************************************************
عــدوك يشهـد بفضـلك وعــدلك
مناقب شــرد اوصفـلك وعدلك
وصي للمصطفى الخاتم وعدلك
كتاب الباري يا حامي الحميه
************************************************************
رمـح جارح وكتنه خله بينه
ثبتنـه وعيب بانت خله بينه
طبع احنه من ابونا خله بينه
نبيع ارواحنه ونحمي الخويه
************************************************************
احبك واعتــذر منك انــة اسف
جمال البروحك مغربل وناسف
احــط بروحــي TNT وناسف
وافجر روحي لو تزعل علية
************************************************************
منــو مثلــي صبـر للضيــم ماهم
وجثير اصحاب وين ابعدو ماهم
شما يثكـل عليـــه الدهـــر ماهم
اهم بفراكم يصعب عليه
************************************************************
صعد شوقك لقلبي ونته قلبي
وصل حبك لراسي ونته قلبي
تريد شلون اعـوفك ونته قلبي
أذا أعوفك يموت الجسد بيه
************************************************************
يدرسنــي زمــانــي دروس وأنســى
شقت ضيم بكثرما شفت ناس وأنسى
بعـد مـــا جــنت للأحبـــــاب ونســـه
صرت منسي ومحد يسأل عليه
************************************************************
يا طارش لو رحت لهناك مر هان
وخبــرهم تـرانــي بسجـن مر هان
ان كان الزاد عدكــم حلــو مر هان
شحلات الزاد لو نكعد سوية
************************************************************
انا بحبك ياصاحب مايعاني
أفديك بروحي وماي أعيني
أنا بصحبتــك ابدا مـاأعانـي
لان صحبتك ذخر لـــــيه
************************************************************
يمرهجرك على كلبي بالف عام
وعليــه اليــوم بغيابك بالف عام
عــهد منــي ما بدلك بالف عــام
شبدلك وانت اعز الناس اليه
************************************************************
لاجــل عينك روحــي ما تهمني
وصدك من كال احبك ما تهمني
احبــــك ياهـــو كـلك ما تهمنــي
ومن اشوفك تشب نيران بيه
************************************************************
نشدت الناس عنك وانت ماكو
علي الهــم يصاحب مثله ماكو
اريد اسمــع علومك شكـو ماكو
وانا المنون من تسال عليه
************************************************************
عليل اصبحت من فـركاك بس نوح
وكضــي الليل كلـــه عليك بسنــوح
اليشيل الحمل عني ايجوز بس نوح
اذا جاب السفينه وفزع ليه
************************************************************
انه جن دوب اضل ارشد ناصح
ابح صوتي على المامش وناصيح
تـدري انتــه الغلط كلــه وانا صح
شصيحن بعد وانته اكطعت بيه
************************************************************
الـوكت مايــوم منــه حيرانــي
الصطرني بس جمالك حيراني
امـوت ويمــر شخصك حيراني
ابنظرة عيونك ترد الروح اليه
************************************************************
الصاحب دوم اكرمنه واقدره
ومن طبعــي فلاخونـه وقدره
وحـك رمضان وايامه وقدره
خوي انت وماانسه الخويه
************************************************************
جمالك يا حلــو چــم عگــل مرمر
جميل انته و بياضك صخر مرمر
قلبــي انتــــه يصـــاحب ولك مرمر
لأن جيتك دوا الكل الم بيه
************************************************************
صبــر ماظـل بعد عنــــدي ولاروح
ولك حبـــك مشي بدمـــي ولا يروح
عساني بمرض ما يشفي ولايروح
اذا انساك يا لغالي عليه
************************************************************
وحــق إلما وصـل واحــد مكانه
تــدري إشكــد إلك عنـدي مكانه
القلب شلته وصرت إنته ابمكانه
او نبض البيك هو النفس بيه
************************************************************
الك ياهو اليوصف حالي فنه
الم و حــزان عمــري حالفنه
اذا ينســـاك كلبـــي حالفانــه
اكطعه اوداعتك بثنين اديه
************************************************************
احبــــك يشــهد العالـــم و شعلـه
و حبـــك شمس للظلمه و شعلــه
اليكرهك راح اسب جده و شعله
لان انته اعز الناس اليه
************************************************************
طعـم حبـــك شهد شمـام بي تين
و الك بحشاي مو فد بيت بيتين
اهدي مــن الشعر لهـواي بيتين
ازهيري و غزل لعيونك هديه
************************************************************
احس دمعات عينـــي كلمنك
ولك مجروح كلبي كله منك
انه اشسويت تكلي كله منك
شو انته العفت او ما فكرت بيه
************************************************************
هجرت القلـم مــن بعــدك والكتاب
وگلبي من العشك بطل والك تاب
وحـــق العرش و القبلـــه والكتاب
اذكرك كل صباح و كل مسيه
************************************************************
حبـــي فمك حبـــك زاد مرتين
و ابد بالدنيه محد عاش مرتين
تدري العمـــر لـو ينعاد مرتين
اشيل عمري الك و انطيه هديه
************************************************************
اصد وازعل و اغار اعليك طبعن
لان جـــويات الك بالكلب طبعـــن
حلــو كـــلك ولاكــن بيـــك طبعين
لاتنشد و لاتتصل بيه
************************************************************
عدل سهمك اجانــي مـن رميته
و تره الصياد واضح من رميته
مـــره الروح عدلـه مــــره ميته
بهواك اتعذبت روحي خطيه
************************************************************
بالك لاتنـــوح ابشــــوك بالك
اوضل مرتاح لا ينشغل بالك
بالك لاتـــحب حلــــوين بالك
يصير البيك مثل الصار بيه
************************************************************
عميت مـن اديــه الوكت ما كاد
و علي ثوب الفرح فديوم ماكاد
انــه دلـــه وربيت ابحظن موكد
اشما افورن زماني استلذ بيه
************************************************************
طار القلب مـن شافــك والك راح
ونظرعيني احس بعدك ولك راح
تـدري شـراح اســــوي ولك راح
اكص فلبي و ادزه الكم هديه
************************************************************
حلاوه وعسل يمدلل صفن بيك
وعقلي ماصفن لأحد صفن بيك
الليالــي ويـن يمدلل صفن بيك
و خلن شوفتك حصره عليه
************************************************************
صـرت نجـار لا انشـر ولادك
الغيرك ما رجف كلبـي ولادك
تـدري لــيش ما رمــش ولادك
لان كلوبنايدگن سويه
************************************************************
خلص عمري واحس الشيب بس لاح
عــداوه وهــد عليــــه الـوكـت بسلاح
المــوت اسباب ماهـــو شــرط بسلاح
وانه موتي بسبب بعدك عليه
************************************************************
عيونـــي طالبــن لجـلك وداعن
وعلا شوفك نخن ربهن وداعن
تذكـــر من رحت كتلـي وداعن
احس الارض وسما طبكن عليه
************************************************************
ذبــل عــود الكلــب لجلك وخاوي
و بعد ما احط اخو غيرك وخاوي
الفخــــر مـو للذي عاشـر وخاوي
الفخر بلضيج لليذكر خويه
************************************************************
زمان الصعب مــا غيــرطبع بيك
وتظل تنشد علي احبابك طبع بيك
الكــرم والجود والغيــره طبع بيك
اريد الله يحفضك دوم اليه
************************************************************
الوكت غدار طبعـه ماله صاحب
واذا تصفـن يغدرك ماله صاحب
انه الضليت وحدي مالي صاحب
صديقي الجان ينشد كطع بيه
************************************************************
صحيـح بعيد بس كلبـــي شعــر بيك
حزين و باقي بس يكتب شعر بيك
عجيب اشلــون باقـي اسود شعربيك
و انا بفركاك ماضل شعر بيه
************************************************************
بسبب فــركاك دلالــي تمرمر
وعليـــه سهام عدواني تمرمر
ابحياتك كلي هم شايف تمرمر
التمر بجفاك حنظل صار اليه
************************************************************
انا بممشاي عيب اختلف وزني
ثجيل اوكل وكت معلـوم وزني
اشـامت لو علــه الخوان وزني
ارد اعليه وكصن شيب ابيه
************************************************************
بقه ابوعده الكلب ثابت وفيلاك
وشجــره دوم اصيرلك وفيلاك
بحـار الكــون لعبـــرهن وفيلاك
وضحي الروح يلتسوي الخويه
************************************************************
تحيـــه الكلــب ودالك منــهلاك
يمــن يشطـركــرم دايم منهلاك
ورث متورث اطباعـك منهلاك
الكرم و طيب و لغيره و حميه
************************************************************
العقل بامرالصديق ارجوك حكمة
وبدال النكتـــة خلـي يكون حكمة
اليغدر صاحبـــة مـــومهم حكمـة
المهم شلون نتلافة القضية
************************************************************
بحــر من طيب ياكلبك شكر بيه
كتاب من العشك جاني شكر بيه
شورطنــي بست خدك شكر بيه
بسته ومرض سكر صار بيه
************************************************************
وحق الي محه العزه محه اللات
شفافــك عســل من ربك محلات
الك على الشارع بكلبــي محلات
محل حب ومحل شاعريه
************************************************************
اكوبنومتة هنية ومرتاح وشي فاز
واكــو باالحب خسـران وشي فاز
وعلــة هجرك اشرب بطل شيفاز
واخلي اهل العرك تحتار بية
************************************************************
يغالــي من الذهب عندي تنكتين
وفواكه عندي صدكيني تنك تين
حياتــــي شمالج اعليــــه تنكتين
اذا اتكدرين هم جذبي عليه
************************************************************
دومك شاغــل افكـاري ورد بيك
حسنك مو حسن عادي ورد بيك
لافـــرنك وسـط كلبــي ورد بيك
وصيرلك مكان تعيش بيه
************************************************************
هاك الكلب بيدك حيل طحنه
امس فوك النجم واليوم طحنه
شبدينه وبالعشك ياناس طحنه
غشمه وكلوبنه تحب الاذيه
************************************************************
سفن حبـك بشواطـي الروح شرعا
وسهــم حبـــك نبت بحشاي شرعا
ردت مذهب يحلل البوسات شرعا
واذا ماكو...اردن للجاهلية
************************************************************
تعال أكرب حبيبي مالي غيرك
وانا أدري أبجمالك مالي غيرك
مال أتــروح منــي مال أغيرك
سولفهه أعله روحك موعليه
************************************************************
يروحي امن الحزن كفي ونالي
لان محد منــه احبابــي ونالــي
السعاده صارت الغيــري ونالي
البواجي وغير ضحكتهم عليه
************************************************************
صافي سماي واهلي عيروني
وسفــة بوزن ناكَص عيروني
مشت روحي وراهم عيروني
صرت جدام خلو صوج بيه
************************************************************
دمع عيني عليك يصب وجاري
ولهيب النار بضلوعـي وجاري
اخـــوي اتحير بحالــي وجاري
يكَلي شبيك وآنة اصفكَ بدية
************************************************************
عشت وياك عشرة فخر وامجاد
بطيبــة قلب ما القــى مثلك امجد
اصيــرن لك اخـــــو ابو ام جــد
انتا بس تآمر وتدلل عليه
************************************************************
يصــاح شبيك صايــر ماتريدنـي
وشحيحة اخبار شخصك ماتردني
جنت دوم مــن اطلبـك ماتردنـــي
شجاك وقفلت بابك علية
************************************************************
يهل روحك عله الطيبات تربه
وعلــه دربك تظل العين تربـه
ياريت اكعد عله مصلاك تربه
وابوسك من تحط كصتك عليه
************************************************************
انا العطشان منك مــي اتاني
مثل صبري بغيابك من يتاني
تكلي شلون صحتك ميت اني
لان فركاك هو العم عليه
************************************************************
اعرف الزين لو هســه عشكني
عشكم مو عشك يابس عشك ني
انه كليبـي الــي لوحدي عشكني
عشكت الروح والوحده العليه
************************************************************
دمع وحـزان حبــك هيـج أذاني
والك مجبور اكضلك هيج أذانـي
تدري انه من اصلـي هيج أذاني
أشهد ان حبك مو بديه
************************************************************
الوكت ذبني على حبك حاضر اني
وابد مـــاصير ماضـي حضر انــي
بخدمتك يــوم تامــر حــاضر انــي
اصير لك جسر واعبر عليه
************************************************************
غيرك ماشمل قلبــــــي وشملاك
وطبع صورتك بعيوني وشمــلك
ردت بس ينجمع شملي وشملاك
ونعيش ثنينه الدنيا سويه
************************************************************
بس انت احبنـــــك واريــــــدك
دشوف اسمي بس باوع وريدك
خذت كلبـي وضميتة ورة ايدك
الك للموت خذ كلبي هدية
************************************************************
اجرح عذب بروحــي ولك حيل
دوس على الجرح دمي الك حل
ما ريد الحلــو الاسمــروالاكحل
اريدن گلب يخلص دوم اليه
************************************************************
سبحان الرسم خدك وشم بيه
وتمنيتك عطر بيدي وشم بيه
عيونك حفرن بگلبي وشم بيه
وكل نظرة منك توصلني المنية
************************************************************
خسر كلمن رضة او وقع بجتلاي
انصبت وعيون عدوانــي بجتلاي
طحت وسيوف خوانـــــي بجتلاي
وردت زنجارهن يفزع عليه
************************************************************
أضعفت ما واحد بربعـي گواني
وشلت حملي على جتافي گواني
اموتن جوع وابقـى البس گواني
ولا فد يوم امدلهم اديه
************************************************************
